系花都老城區嘅橫街窄巷裡面，總系可以見到唔少小攤檔，佢地嘅位置唔好搵，可能出攤嘅時間都唔固定，要遇見佢地就要睇緣分啦。
但系系聚賢街附近有個阿姨，擺攤擺咗七、八年了，絕對系呢一帶最受歡迎嘅糖水阿姨，附近學校嘅學生都爭住叫佢去自己學校門口擺檔！
撐家姐作為一名曾經系附近讀過書嘅學生，對嬌姨嘅糖水絕對系回味無窮。
就算依家已經畢咗業了，都會經常返嬌姨度食碗糖水，同嬌姨吹下水。
嬌姨同老公系清遠人，十年前就從清遠來到花都生活。
嬌姨啱來到花都嘅時候，系工業園果邊上班嘅，後來因為工作晚晚都要加班到好夜。
熬得太辛苦了，又無咩時間陪屋企人，後來就霖住不如自己煲糖水嚟賣。
咁樣既可以做自己中意嘅嘢，又可以多d時間陪屋企人。
嬌姨嘅攤檔系一個轉角位置，簡簡單單系手推車周圍擺幾張臺同膠凳。
每日都有好多附近嘅街坊過來坐低食碗糖水，同嬌姨傾下計。
嬌姨系會隨住季節變化而整唔同嘅糖水，到熱d嘅時候，就會有龜苓膏賣。
嬌姨話呢幾日佢唔得閒，所以無煲到其他糖水，過年果段時間就會有好多款糖水食啦~
撐家姐覺得嬌姨呢度最好嘅就係每一種唔同類型嘅糖水，都會繫個桶度貼住佢嘅功效，等食客清楚咁瞭解呢度每一種糖水都會對人體有唔同嘅好處。
嬌姨d芝麻糊系自己手工製作嘅，每日早上就整好，中午就車出來賣。
濃稠柔滑嘅芝麻糊，一羮落下去再上來，芝麻糊沿著滴漿軌跡向我哋展示佢嘅順滑，陣陣芝麻香氣，中意聞芝麻香嘅人一定好中意呢種氣息。
嬌姨嘅黑芝麻糊粘稠得嚟又無渣，甜味適中，一直都系撐家姐嘅最愛~
撐家姐以前系呢邊返學嘅時候，每日落課之後都要同宿舍d舍友出來食芝麻糊。
真繫好懷念系學校嘅日子。
嬌姨呢度嘅豆腐花系最受歡迎嘅，好多人專登過來就係為咗一碗豆腐花。
嬌姨話：“好多附近高校讀書嘅學生都話好中意食我d豆腐花，成日叫我去佢地學校門口擺檔！哈哈…”
嬌姨d豆腐花真繫好抵食，啱曬d學生哥消費。2蚊一碗細嘅，3蚊雞就一大碗啦！
豆腐花好嫩，好滑，一吸大半羮就入曬嘴了，輕輕一含就會融化入肚。
撐家姐仲打包咗幾碗返公司俾其他同事做下午茶。
嬌姨好貼心咁同撐家姐講：“豆腐花打包就唔好加糖漿啦，直接加白砂糖。加糖漿嘅話，返到去d豆腐花凍咗就唔好食啦。”
其實嬌姨呢度嘅豆腐花除咗正常食法之外，仲有一種“唔正常”嘅食法，就係豆腐花加芝麻糊 啦！
系咪覺得好奇怪？好似黑暗料理？嬌姨話，咁樣食法先系最正，鋪一層芝麻糊系豆腐花面，咁樣豆腐花就唔使加糖漿或者白砂糖啦。
豆腐花既有豆嘅香味，又會有芝麻糊嘅香濃芝麻味，同淡淡嘅甜味。
甜酒湯圓，撐家姐仲系第一次食。平時系屋企，撐媽媽煮甜酒俾撐家姐補身，都淨系加雞蛋落去煮。撐家姐依家先知原來甜酒煮湯圓系咁好食嘅…
“湯圓”其實就係細細粒嘅糯米丸，加甜酒、紅棗同杞子一齊煲，好補~咁凍冰冰嘅天氣，食翻碗甜酒湯圓，成身都暖曬~
糯米丸子好軟糯，吸曬甜酒嘅酒味，食幾啖已經感覺個身開始暖了，最啱就係我哋女仔食嚟補身啦！
與其話嚟嬌姨呢度食糖水，不如話系嚟“養生”！
嬌姨d糖水，樣樣都系“養生系列”，好似呢款紅豆薏米粥咁。
嬌姨嘅紅豆薏米粥落足料，嬌姨話每日都要煲好多，早上就要開始煲，一賣曬就要返去煲。
d紅豆煲到爛曬，食落好綿滑。
嬌姨呢度仲有豬腳醋食，一碗大碗豬腳醋先8蚊！想食嬌姨煲嘅靚嘢，撐友們就要早d去啦~
嬌姨話，以前佢仲買粥粉面嘅，因為啱開始嘅時候，佢個仔都系度幫手，仲送埋外賣。
不過依家嬌姨個仔自己系出面搵咗份工，就唔得閒來檔口幫手啦。嬌姨自己又做唔切，所以就無做粉面了。
嬌姨話：“附近交通學院d學生都系我d常客，成日過來打包糖水，有d依家已經出來實習嘅學生，都會經常返嚟幫襯。”
大街小巷嘅糖水車，系一項生計，都係一種文化，更系一臺滿載生活味道嘅謀生工具，可以作為一座城市嘅風景線。
有d地方，有d人，有d照片，之所以變得珍貴系因為佢地承載紀錄咗我地嘅某些回憶。
呢d系大街小巷嘅老街坊糖水車，就係咁樣默默存在！
Mark低地址，返去搵嬌姨食碗糖水。
嬌姨糖水
地址： 花都區新中路(花都人民法院往裡走500米)
交通指引：乘坐花7路、花8路到新華影院站下走500米左右
地圖：
閱讀更多 花都我撐你 的文章
