系花都呢座城市，各鎮街鄉村仲保留住趁墟呢個傳統 。
但系後來有咗某寶嘅出現，依家好多年輕一輩嘅人都遺忘咗“趁墟”呢個傳統文化。而你又記唔記得，你有幾耐無去過趁墟啦？
“趁墟”系廣府文化一種古老嘅習俗。指系某個特定時期裡面嘅一種傳統貿易方式，因定期而集，所以又叫趕集，集市貿易。
系商品經濟尚未發達嘅時候，“趁墟”系一家人選購日用品、食物嘅重要方式。
一d平時集市裡少見嘅商品，“趁墟”嘅時時候就能夠買到。而且“趁墟”嘅時候人多，十分熱鬧。
系獅嶺，有以村命名嘅墟市，都有幾個村共享嘅墟，系獅嶺市場嘅四街都有一個墟市，最熱鬧嘅時候系9:00到11:00呢段時間 。
撐家姐同阿撐為咗來趁個最熱鬧嘅墟，今朝一大早就從新華趕到獅嶺。
雖然今日又凍又落住毛毛細雨，但系都阻擋唔到獅嶺街坊一大早來趁墟嘅熱情。
一行入獅嶺市場四街，車水馬龍中都系熟悉嘅鄉音：“哎！來趁墟啊！”
依家趁墟嘅都系“大媽，大爺”等等嘅叔叔阿姨，爺爺嫲嫲輩，好少後生仔女。
今日真系特別多嘢賣啊！檔主都擺曬自己d“私家嘢”出來賣。
餐餐必備嘅蔬菜肯定唔少得。每一樣菜都系農戶自己種嘅，趁今日墟日，車多d嚟賣。
除咗有婆婆自己種嘅蔬菜之外，伯伯都唔執輸，擺曬自己一手一腳種嘅番薯出來。
唔少老一輩嘅街坊都會話，佢地以前窮嘅時候日日挨番薯。依家物質豐富啦，大家依然系對番薯情有獨鍾，懷念嘅仲系當年嘅味道。
撐家姐發現大多數檔主仲用緊傳統嘅桿秤，足稱之餘，仲搭幾條蔥之類嘅，街頭巷尾中充滿住濃濃嘅人情味~
每到墟日，d商戶就會將自己屋企養嘅家禽車到墟場來賣。
家禽檔肯定會見到熱鬧非凡嘅場面，討價還價聲不斷。
除咗家禽之外，仲有好多檔賣羊肉、豬肉，檔主仲現場施展刀工！三兩下手勢就剁好塊肉。
撐家姐仲見到有燒臘檔，一排都系燒鴨、燒雞、燒鵝，連燒豬都有！
外表油亮嘅北京烤鴨系我地面前轉來轉去，見到都流口水~
撐家姐記得細細個果陣中意跟住外公外婆去趁墟，肯定要去斬料返屋企加餸！
除咗普通嘅家禽同燒臘之外，仲有d特別嘅嘢，阿叔話佢呢d叫蚌，系農村d魚塘先有嘅，食落好清甜。
阿叔仲話，佢今朝好早就特登從炭步趕過來擺攤。
墟市入邊其實有好多檔主都系來自唔同嘅鎮街，佢地收到風邊度墟日，就會不約而同從唔同嘅地方趕過來擺攤。
依家嘅人都系中意直接買一套四件套，好少話特登來市場親手揀翻匹布車張被。
趁住墟日，撐友們可以來到呢度揀翻匹自己中意嘅布，叫老闆娘幫手車張被啦~
撐家姐都唔執輸啦，揀翻張被，帶返辦公室訓中午覺先…
老闆娘話，佢呢度仲可以幫你量身車衫。
撐家姐好耐都無見過車衣機了，記得以前細個，每家每戶都會有一臺。
以前屋企總系迴盪住嫲嫲嘅車衣聲，撐家姐就係旁邊靜靜咁睇住嫲嫲幫自己車衫，果種童年回憶真系令人難忘。
如果你覺得天寒地凍，齋有張被都未夠，咁你仲可以過來買個暖水袋，而且系呢度賣嘅價錢比商場賣嘅抵好多。
生活用品真系樣樣齊，而且又平又靚，師奶們來呢度淘貨肯定好滿足！
仲有呢d竹製品，除咗系墟市，其他地方應該好少見得到佢地嘅身影。
呢d手抽、雞籠、竹籮等等，都系d農戶自己親手編織嘅。做工細緻，形態各異。
撐家姐發覺，獅嶺人真繫心靈手巧。佢地除咗識編織竹製品，仲識整木製品。
呢度一條街落去好多賣木製品嘅店。全部都系手工整木櫃、床、木凳、木臺等等。
雖然依家就連床都可以上網買，打開某寶，真皮床、榻榻米床、布藝床等等，一應俱全。但系始終仲係會有人對木床情有獨鍾。
以前好多人屋企嘅床都系自己親手用木整，而且木床比較耐用，可以訓好多年。
不知不覺，已經到咗中午，墟市嘅人群逐漸散去，夠鍾返屋企煮飯啦！
來趁墟d街坊都大包細包咁走。
有d街坊仲裝到個籃滿曬。
撐家姐見到呢個小朋友好乖啊，跟住爸爸來趁墟~
令撐家姐諗起細個果陣跟住婆婆去趁墟，都繫好似呢個小朋友咁，好乖咁拖實婆婆隻手，唔會扭計。
一個城市，有光鮮亮麗嘅大商場，都有接地氣嘅小墟市，包容萬千，墟日裡最能體驗當地人文風情，鄉土特色。
依家d人都習慣繫有空調嘅商場或者上網買野，呢種露天而且夾雜住泥土味、魚腥味嘅墟市，相對於超市令人乏味嘅促銷熱鬧，呢d先系真正嘅熱鬧！
趁墟系我哋花都嘅傳統習俗，但系佢已經開始漸漸被花都人忘記，我哋年輕一輩應該將呢d傳統傳承落去，唔好遺忘咗佢地。
系花都仲有好多墟市都好熱鬧，Mark住個墟期，得閒去趁墟掃平嘢！
花都其他鎮墟日
獅嶺：每個月2、5、7日結尾
旗嶺：每個月0、3、6日結尾
長崗：每個月5、0日結尾
炭步：每個月3、6、9日結尾
赤坭：每個月1、4、7日結尾
兩龍：每個月4、9日結尾
花東：每個月2、7日結尾
撐友們同“趁墟”之間有d咩有趣嘅故事嗎？留言話俾撐家姐知啦
閱讀更多 花都我撐你 的文章
