第一代邵氏武打女星鄭佩佩，早喺1965年憑邵氏兄弟臺灣分公司拍攝嘅文藝片《情人石》參加亞洲影展，獲得美國國際獨立製片人協會「最具前途影星金武士獎」，隨後在胡金銓《大醉俠》中的演出，更奠定其
一代銀幕女俠的地位。
不過鄭佩佩喺佢24歲演藝事業如日方中之時，突然宣佈息影與原文通結婚，並一同遷往美國定居組織家庭。鄭佩佩思想傳統，想為3代單傳嘅原家生個仔。呢個想法令佢經歷8次懷孕、4次流產，但佢都冇放棄「造人」，最終亦得償所願育有3女1子。
外傳原文通係富商，而事實上，原文通嘅父親係邵氏公司喺臺灣嘅代理商，結婚時原文通仲係一名美國留學生。
婚後鄭佩佩並冇過少奶奶生活，佢照顧小朋友之餘仲兼顧工作，包括教舞蹈、幫丈夫嘅進出口公司驗貨，後來仲開小百貨商場，一手一腳搬運電視機，甚至仲考房地產執照，更創辦華語電視臺 。好景不常，1989年鄭佩佩同原文通因為一次爭吵，19年嘅婚姻就此劃下句點。走出前夫嘅辦公室，佢開始責怪自己沉唔住氣，「如果能忍讓一下，或者就能為小朋友保住一個完整嘅家。」佢當時係咁諗。
人生最落魄，走投無路嘅時候，鄭佩佩遇見了星雲大師，喺1992年皈依，並獲賜法名「普方」 。星雲大師希望佢借用自己嘅影響力，用佛法普度十方。惟佢並冇馬上走出困境，情況最差嘅時候，連三餐都成問題。
當時佢打算離開洛杉磯，去澳洲尋求發展機會。離開前，佢去到西來寺禮佛用齋，一位住持嘅幾句話，令佢豁然開朗：「任何事都是一半一半的，一半陰一半陽，一半男人一半女人，一半白天一半夜晚，一半好一半壞，一半快樂一半痛苦。」
其實都係老生常談嘅半杯水哲學，但呢幾句說話，就好似有人向就快浸死嘅佢拋出救生圈。之後20幾年，鄭佩佩熱心參與佛光會活動，也擔任檀講師，在世界各地弘法。
分享到:
閱讀更多 娛聞樂HK 的文章
