《大帅哥》上星期五剧终，虽然大家都好唔舍得张卫健，不过紧接播出嘅《荷里活有个大老千》就喺噚晚出街，大家对呢套剧嘅反应都唔错，无他嘅，皆因新剧有5个成功吸引观众睇嘅原因！
王晶监制嘅《荷里活有个大老千》噚晚接棒《大帅哥》播出，由郑则仕、汤镇业、秦沛等演艺圈前辈坐阵主演，剧集讲述六十年代香港人嘅日常衣食住行之外，仲以赌博为剧集主线之一。
简单同大家讲讲呢套剧系关于啲咩，故事讲以老千技术闻名嘅「千门八将」中嘅龙四（郑则仕饰）被华探长文雄（汤镇业饰）与大师兄庞峰（秦沛饰）联手设局陷害入狱，其后龙四如何报仇。
当然剧集就唔系只得报仇咁闷嘅，当中再会有怀旧、赌博、感情等元素，其中更有五大主要因素增加观众收看性嘅同时，亦令大家绝对唔可以错过呢套新剧！
5大必睇原因
｜老戏骨助阵
呢套剧最有亮点就系演员阵容，剧中搵嚟两届金像奖影帝郑则仕担正做男主角，而且仲有汤镇业、秦沛呢两位演艺圈老戏骨坐阵，三位有几好戏就唔洗讲，净系听到有佢哋出演都已经令剧迷好期待佢哋嘅演出！
除咗有以上三位老戏骨，仲有多次获得香港电影金像奖最佳女配角嘅金燕铃同张慧仪呢两位好戏之人出演，成功再令新剧演员阵容再锦上添花！有见及此，相信唔少观众都唔想错过睇佢哋喺剧中大斗演技嘅时刻！
｜王晶出品话题性强
啱啱就提过，今次呢套TVB贺岁剧由王晶监制，虽然有人会弹王晶有份制作嘅剧集同电影水准每况愈下，不过佢搵到咁多有份量嘅演员出演，都足以令新剧充满话题性！
｜怀旧题材
剧中以60年代作背景，除咗讲赌博外，仲加插讲述怀旧味「大片场」，如果系嗰个年代嘅观众，应该会有更大共鸣，皆因60年代正系香港电视发展时期，想当年邵氏捧红几多位大明星！
另外，剧中一班年轻演员影射当年嘅大明星，例如当时嘅明星点样上位等，所以即使系较年轻嘅观众都会有好大兴趣睇！
｜加入新面孔出演
剧集正正因为要影射当年明星上位之路，所以就有一班年轻演员加入拍摄，今次更搵嚟公仔箱少见嘅蔡瀚亿（BabyJohn）、陈雅思、「晶女郎」文凯玲等，为煲开电视粥嘅观众带嚟一定嘅新鲜感！
值得一提嘅系，虽然BabyJohn喺剧中占有一定重嘅戏份，可惜因为佢份属萧定一旗下，其公司与TVB有官司纠纷影响，所以喺官方宣传方面就注定冇佢份！不过BabyJohn都好有演员责任心，皆因佢都落力喺自己IG提醒粉丝剧集已经出街！
｜尹光唱主题曲
今次TVB更特登搵嚟「庙街歌王」尹光唱剧集同名主题曲，众所周知尹光嘅歌曲风格歌词一向贴地兼鬼马，今次难得搵佢唱剧集主题曲，令剧集再添怀旧60年代嘅味道！
閱讀更多 日日趣事 的文章
