下一站，广州花都老地方见

夜晚无论系边度都好，都可以睇到食紧宵夜嘅人，或者系赶去下一场食宵夜嘅人。突然霖起洪卓立《弥敦道》歌词：街边太多人与车，繁华闹市人醉夜

大概每个人都会有几间自己好中意嘅店。无论生活点变，工作几忙碌，依然会挂住记忆中嘅味道。

怀念朋友仔一齐度过嘅珍贵时光，因为保存住我地嘅童年、友情亲情甚至系爱情~

而我系个日常加班族（点解加班？因为写稿比你地睇！）通常落班已经深夜，所以经常同埋同事去食宵夜，对宵夜绝对系真爱~

呢间宵夜店系由一对夫妻从06年开始经营，老板同老板娘都系本地人，开店至今已经长达13年啦！主要经营宵夜同花都本地口味~

一开始经营地点系个好细嘅店面，因为生意增长，人流量增加，然后搬咗去清布市场入面一个大约30平方嘅店面。

后面生意越做越好，又决定再次扩大店面，搬黎宜家呢度有两三年了，二楼仲设有包间添~

附上宵夜店菜品价格先。除咗价格实惠之外，菜式都非常之多，菜单竟然长达10页！！所以我放住部分菜品图比大家感受下先~

选择太多，犹豫咗好耐！因为全部都想食一次！最后贴心嘅老板娘实在睇唔过眼，为我地推荐咗招牌菜~

生滚煲仔粥系店招牌，纯手工熬制、材料新鲜、味道鲜美、口感很滑。用瓦煲翻煮然后盛上，一人一个煲非常有特色，系传统广式粥~重点系料很足！！

粥底熬制时间充足，最后煮出嘅粥超级绵，一勺探底捞起丰富嘅食材，试一啖，顺滑口感中透出鲜味~

老板娘话招牌粥最受欢迎，一日煮一大煲，基本上日日都可以卖晒，手快有手慢无啦~

系花都人心中，“粥”嘅地位等同于滋润补身嘅“老火汤”，系日常饮食中不可或缺嘅一种味道，食翻碗热辣辣嘅靓粥，再疲倦嘅身躯，此刻都变得温暖~

用姜葱蒸竹肠系属于清淡类，而铁板就比较倾向于香口~最后我地选择咗姜汁蒸~

竹肠爽嫩不油腻，竹肠系粉肠头，都洗得好干净。姜味比较浓郁，都唔会有臊味，入味之余仲保留住竹肠嘅韧度，分量好足，三个人都食唔晒添~

田螺脆嫩，紫苏香味独特，系一道家常菜。会霖翻起细路仔个阵爷爷奶奶系身边嘅时光，忆起儿时一齐挽住只桶仔去河仔稳田螺。

尤其系中秋节期间，每家每户都会食翻碟螺，原来细路仔个阵快乐可以咁简单~

用新鲜田螺搭配紫苏，完美嘅下酒菜~花都本地人比较中意食蒸田螺，因为多汁。而外地人就比较倾向于辣椒炒螺啦~

大小同我只手不相上下，历经一番小火香煎，金黄色嘅香煎芋丝香香脆脆，食起身“卜卜脆”，芋丝口感细软，绵甜香糯，正啊~

温馨提示：最好系趁热食，放耐咗口感无咁好，刚煎出黎嘅会比较脆~

铁板猪杂入面有肠头、粉肠、猪肝等等一系列猪嘅内脏，我有d拒绝食猪内脏，所以当时我无食。不过上菜个阵嘅滋滋声，再加上闻起身好似又真系几香~

呢间店嘅菜品全部都系出自老板，系由老板亲自下厨嘅添，上菜速度快！而老板娘就负责落单，两公婆忙到踢晒脚~（老板抛镬嘅时候真系好型啊！）

老板得闲个阵都会同伙计一齐吹水饮茶食瓜子。有无发觉，老板有d似发福版嘅“温兆伦”，哈哈哈哈~

通常比我影完相菜品都已经冻晒，而老板娘好贴心帮我地加热咗！感动~而此时老板娘同老板终于有时间坐低休息下同我地吹下水。

老板娘话佢地系一家人分工合作嘅。家公负责采购肉类，老公负责采购其他食材，家婆就负责熬粥，而老板娘就负责照顾一对仔仔女女，真系好幸福~

老板娘分享嘅呢一瞬间，我望见老板娘脸上充满幸福嘅笑容。其实最向往嘅生活莫过于有一个爱你嘅另一半以及拥有一对仔仔女女，再然后有一间小店，一家人开心过每一日~

唔食宵夜等于无咗灵魂！减肥放埋一边，食完先有力减肥！一到夜晚就有好多附近街坊黎帮衬，深受附近街坊喜爱，简直就系深夜食堂。

重点系老板同老板娘好nice，亲切又和善，咩话题都可以接得上，仲同大家倾得好开心~搞到我忍唔住合影翻一张添~

老地方美食馆

地址：清莲路与清潭东路交叉口

交通指引：地铁9号线清布站C出口约700米

营业时间：下午5:00—凌晨4:00

价格：人均40+，好抵食

地图：

其实每个城市都会有开咗10几年嘅老店，总会有几味独特小菜，接地气且充满生活气息，激活大家嘅记忆。咪讲咁多先，干咗呢杯酒~

咁我嘅初衷就系分享好玩好食嘅野比大家，所谓民以食为天。咁你地仲有咩好介绍？底下评论话我知啦~我地下一站见

閱讀更多 花都我撐你 的文章

關鍵字: 食紧 美食 周渝民