联赛间歇期，国家队重新上路。但重新上路的结果，却……北京时间本周二凌晨，中国队客场与巴林队的友谊比赛还没结束，一友人就急不可耐地打来电话。
友人愤愤然：娄兄，国家队比赛看了伐？啥意思啦？迭帮人会的踢球伐啦？我看得来真个是一包气啊……
我只能赔笑脸：兄弟消消气，后半夜来，呒没必要介激动呃呀，明朝还要上班呃……
友人依然激动：侬讲是伐啦？踢得来啥么事，上一场对卡塔尔，全场比赛只有两脚射门，开场12分钟就开始走路。网廊厢一段视频侬应该看到呃，于海掼边线球，寻勿着人，拼命喊“跑一跑，跑一跑”。真是坍台啊……
我：是呀，迭段视频倒真额是影响老大，弄得里皮蛮呒没面子呃。
友人：就是讲呀！据说人家卡塔尔队侪是U23球员，平均年龄要比阿拉小五六岁。结果呢？我勿是瞎讲，格天我看到后头真希望人家多进两只，索性就打一场大比分出来，阿拉看了心死了就再也勿看了！唉，娄兄啊，做中国队球迷真吃力啊……侬晓得呃，我从小跟牢阿拉老头子看中国队，三十几年，伊已经勿看了，但是我还是熬勿牢呀……
我：兄弟辛苦！但是我格天发个一条微博侬看到伐？评论国家队踢卡塔尔，就是“本来就不想踢，非要征召入队。自己又不能拒绝，俱乐部又不敢不放。主场踢踢也就罢了，还要远赴客场，吃力啊……”
友人：对呃对呃，我好像看到呃。个么哪能会得出现迭种情况啦？
我只有苦笑：侬想呀，世界杯结束，中超联赛重新开始，从7月17日-9月2日连了踢了十轮，加上有些球队还有足协杯比赛，再加上天气因素，还有亚运会，球队消耗，球员消耗，有几个球员愿意迭个辰光拨召进国家队？而且，侬看看接下去格中超赛程，马上广州恒大要连牢踢北京国安、上海上港，直接关系到联赛冠军，侬讲讲看叫迭三支球队格国脚哪能弄法？万一因为国家队比赛受伤了，后头比赛哪能办？还有一点，俱乐部为迭眼国脚付出多少代价？对伐？侬老兄假使是俱乐部官员大概已经昏过去了……
友人：照侬迭能讲法，下趟国家队就覅打友谊比赛了？人家欧洲国家队勿是一样踢比赛呃吗？
我：呵呵，还是勿一样个……人家是因为新赛季刚刚开始，联赛只打了几轮？还呒没到俱乐部要拼命格辰光，而且所有召进国家队格球员需要多几场比赛来调整激发状态。阿拉此地呢？大部分俱乐部里厢外援勿需要去踢国家队，但是中方球员好临时退出伐啦？啥人敢啦！所以弄到最后就变成球员、俱乐部有苦讲勿出，国家队嘛拨人家拼命骂消极比赛……
友人：格么就呒没办法解决了？
我：解决？拨我讲起来嘛只有叫中国足协检讨自家排联赛赛程格辰光为啥呒没仔细考虑？为啥世界杯之后格联赛赛程要排得来介急吼吼？啊是弄得来方方面面侪尴尬伐？啊是吃力勿讨好伐？
友人：唉……算了，勿想了，侬就只当我迭只电话呒没打来过……
閱讀更多 東方體育日報 的文章
