城事佛山都寫了甘耐，系時候寫翻篇粵語推文了。用粵語寫，當然就講翻粵語。而作為城事佛山，梗系講翻佛山話。
點解講佛山話，因為佛山話同廣州話，究竟同唔同，無論從我路邊聽到D伯父講，或者系翻書睇翻來的，都有好多說法。而呢次，我查閱咗相關D材料，發表下D淺見。
好多年前，省城流行一句話：“廣州人講廣州話，聽唔明就返鄉下”（其實我聽的最多成日都系“得就得唔得翻順德”），雖則當時講緊另一件事，“鄉下”亦並非指嶺南之水鄉，但今日睇返，確係至理名言。省城話源於四鄉（遮番禺、增城、花都、從化），其中甚多字詞仍可從周邊鄉下話中搵到本源。若然返鄉下走一轉，對省城話必然瞭解更深。
睇電視電影，插入幾句鄉下話，例如台山話，潮州話，又或者佛山話（順德話），都可收諧趣之效，最近網絡上流傳數段「張槎話」配音短片，亦甚受歡迎，再加上呢家有暴龍哥鄭中基果種應該系東莞還是深圳D客家混粵語，都好盞鬼，有見及此，特設四鄉話專題，幫助各位看官老友記快速學講幾句特色鄉下話。（有時候鄉下話都幾過癮幾好用的）
頭炮就由同屬粵語廣府片慨佛山話開始。佛山系最接近廣州慨城鎮，但此地語言已與省城話頗有分別，但系雖然有所區別，但又好相似，或者講佛山學了廣州話，又或者話廣州話又融入D佛山話。本文以佛山舊城區話為參考，從聲母，韻母，聲調以及習慣語四方面與省城話比較。
聲母t - > h
佛山話聲母最大特點就係冇t，省城話以t為聲母慨字，佛山話一律以h代替。“天天見面”講成“牽牽見面”，“通殺”“兇殺”兇殺。
有句水蛇春咁長慨佛山話音謎，系甘講的：“鹹紅學紅蝦蟹蟹牽牽慶起空航虛氣heng”，答案乃“譚同學同他太太天天挺起胸膛推氣艇” 更有頑固人士，將此規律應用至其他語言，因此“普通話”變身“普哄話”。
除此以外，另有個別字慨聲母有變化，不過都幾難以總結。例如“渠”[keoy5]，佛山話大多將其讀成[heoy5];“瞓”[fan3]讀作[han3]（按：省城話亦有此讀音，遮大家經常聽到——han3覺）。
韻母
1i[*衣] - > u [*於]
而家，相當多人都會開玩笑，將“咩事”講成“咩樹”或“咩樹幹”，查實此讀音來源於佛山話。佛山話之中，韻母i [*衣]通常都讀成u[*於]，例如“寶芝林”變成“寶豬林”，“廁所”變“處所”，“絲”變“輸”，故此佛山人稱“絲瓜” 做“勝瓜”，皆因“輸輸”聲唔好“輕”（聽）。更有甚者將此規律應用至北方官話甚至英語之上，某化學“老書”（老師）上堂用官話講解“原子”“分子”讀為“原煮”“分煮”，某電腦銷售更同個客講：要格式個“輸”盤（C盤）。
2aau [*教] - > eu（近似讀英文L）
部分字有此類現象，如“搞”讀作[geu2]，「瞓覺」讀作[han3 geu3]，但此規律不能濫用，事關好多字系唔需變音慨。
查實，根本系音素aa同e之間慨變化，此現象可引申到「八」慨發音，由[baat3]變為[bet3]。以此規律讀「八百八十八」，反為清晰得多，唔會發生「八」，「百」難分慨懶音通病。
3聲平陽平聲 - >陰平聲高降調
佛山話慨聲調規律只得一個，就係冇陽平聲，但凡省城話讀陽平聲慨字一律轉調為陰平聲慨高降調，調值與漢語拼音之去聲（第四聲）相若。例如“人客”讀“恩客”，“同學”讀“空學”。講就簡單，但聲調慨變化慨嘢好蝦人講，好多貪過癮想學佛山話慨人就係拿捏唔凖聲調變化，唔該變慨亂變，該變慨又變咗第個調，講到唔湯唔水，唔鹹唔淡。
習慣用語
除讀音以外，仲有部份用詞同鮮見於省城話，略舉數例。
嚕個（嗰個），嚕便（嗰便），阿時[SI2]（嗰陣時），阿啲（嗰啲），又呢又嚕（又咁又咁，又這又那）
哥記喺唔喺蓋（？阿哥喺唔喺度呀）
返歸吃飯（返屋企食飯）
未曾聽過（命聽過）
eu渠返嚟 （叫渠返嚟）
就間重喺度/喺許（頭先仲喺度）
[leon5]卵瀉喇，快啲閂水喉（滿瀉喇，快啲閂水喉）
揩理（碌葛），死得
仲有一個，“放低”同“劑低”，究竟變個系佛山話變個系廣州話呢？
與此同時，廣義慨佛山話亦包含石灣，張槎，瀾石等口音。相對於佛山舊城區話，石灣話口音更濃，比省城話變化亦更大例如“眼”系[en5] ，“煙”系[en1]，三個人稱代詞「我」，「你」，「渠」分別為[oi5]，[li5]，[kyu5]，只有石灣話唱慨歌仔：
石灣[wen1]石灣[wen1]好多煙[en1]
煙[en1]親我[oi5]隻眼[en5]
醫來[loi1]醫去都醫唔[m1]返[fen1]
我[oi5]以後都唔[m1]去石灣[wen1]
最後，為了考研大家學成點，出幾個粵語問答題比大家做下先：
選詞填空
一般有呢個粵語稱謂的人，都叫咩名？
1.潺仔（） 2.奸人（） 3.牙搽（） 4.大麻（） 5.肥婆（） 6.高佬（） 7.雞公（） 8.大頭（） 9.聾耳（） 10.倀雞（） 11.豬肉（） 12.哨牙（） 13.刀疤（） 14.大隻（） 15.鹹蝦（） 16.大肚（） 17.菠菜（） 18.喪（） 19.馮仁（） 20賣魚（）
有D名字，係源自街知巷聞的電影角色，例如《功夫》，或者電影《黃飛鴻》、《大鬧廣昌隆》、《七十二家房客》，而有D系本身真有其人，演員本身身材而有呢個稱呼，又或者中文字字形結構，又有D來自原諧音，更有源於粵語粗口啦。
閱讀更多 小小是個好同志 的文章
