3、一顿生活
这个世界上大概呒几个小倌是呒吃过生活的。
必须要讲,姆妈是那种心软到像冰激凌一样的人,伊很少发脾气,不管吃多少苦,受多少委屈,总是一个人去扛,所以后来搬进楼房,听到任贤齐《心太软》的辰光,吾在想,姆妈就是心太软,挨下来吾也是心软,像姆妈那样心软,吃苦、吃亏,一个人受就可以了。
弗晓得这是对还是错,或者讲呒对错。
姆妈对人总是客客气气,人家要吾俚帮忙,只要条件允许,一定会得帮,对吾,疼爱有加,用启东话讲就是宝贝,但弗容吾,弗许犯原则性错误,一旦发现,肯定是一顿生活。
要晓得心软的人发起脾气来弗得了,夸张点讲法是房顶能被搀翻。
房顶当然是弗会被搀翻,但是屁股就讲弗定了。
姆妈很少打吾,吾可能是这个小队里吃生活最少的小倌了,但一旦弄生活吾吃,一定是辣手辣脚,这个叫辣虎酱,啥味道,辣膨膨,红通通,痛兮兮,奥去话伊。
这桩事体至今还记得清清爽爽,因为是真的被打痛了,弗仅是屁股痛,还有心痛,用一句歌词来唱,就是“心痛得无法呼吸”。
事体发生在某一年的秋天。
屋里厢办事体,来了客人,有蛮多小倌,男小倌、女小倌、大小倌、小小倌,吾当时已经弗能算是小小倌了,何况是吾屋里厢办事体,吾应该要对大家负责。
下乡烂泥地多,那几年要修路,挖了填,填了挖,西河头有高炮头(并非炮头,而是土坡,文中所叙述的高炮头比路面大概高了一米),经常有小倌勒高炮头白相,听说有小倌挖出过骨殖甏,看到过骨头,有小倌胆子来得大,根本弗吓,吾俚也想去白相相,看看传闻是弗是真咯。
传言是真的。启东老早是用土葬,先用棺木土葬,隔年冬至或者大寒,由家人开启棺木棺木士气遗骨装入骨殖甏易地再葬,挖着骨殖甏也是正常,乡下老早呒公墓,骨殖甏葬在离屋里近的地方,到清明、年三十夜、正月半上坟,后来殡葬改革,吾还记得第一次迁坟的场景。
吾带着这群男小倌、女小倌、大小倌、小小倌在高炮头白相,交刮辰光呒这样放松过,吾要飞得更高,像风筝一样,越飞越高。
飞得越高,摔得越疼,大半天的自由是用一生难忘的代价换来的。
回到屋里,一身烂泥,男女大小小倌都是这模样,一顿生活已经在后头等着吾。
等事体办好,亲眷回转,碗筷理好,只剩下姆妈跟吾,晴天变成霹雳。
吾弗晓得错勒哪里,白相有错吗?
白相呒错。
为啥打吾?
因为弗该带伊拉出去白相。
人家好带了小旁友出去白相,为啥吾就弗可以?
因为人家是人家,人家出了事体人家负责,唔做领头老鼠,跳上跳下万一出了事体当然要唔负责,唔负责勒起伐?
吾带伊拉出去就要负责,哪里有这个道理,老早人家跟吾白相,弄痛勒吾,啥人负过责任?吾眼泪水趟趟滴,弗服气,小倌道里出来白相还要负责东负责西,凭啥?凭啥要吾来负责?
所以平常弗让唔出去跟伊拉白相。唔要晓得,屋里厢呒啥钞票,出点事体,赔弗起个呀。
这个是姆妈的逻辑,吾当然弗好讲伊是错咯,做人要有担当,要有责任心,既然是吾带伊拉出去白相,吾就要对伊拉负责,但是吾才几岁,虽然讲已经是大小倌了,但还是个小倌啊,吾晓得点啥?
这就是前头讲过的“人家小倌哪能,吾管不着,也呒办法管,但是自家小倌吾好管,出了啥事体,总归是管自家小倌。吾希望自家小倌好太太平平,弗要出啥事体。”
吾试图再反驳些什么,但越是这样,打得越疼。
小爸(小叔)屋里离吾屋里只有几米远,听到吾的哭声,堂妹也奔了过来。
伊是今朝跟吾出去白相中的一个,看到吾被姆妈打,求起情来。
“奥打了呀,三妈妈(伯母),阿哥弗宁做错事体打伊做啥啦。”
越是求情,越是打勒凶,对姆妈来讲,吾犯的错容不得任何人求情。
堂妹也跟着哭,伊弗晓得我到底犯了啥错,伊从来呒看到过吾妈发过这么大的火,吾晓得,伊被吓到了。
姆妈终于停手了,看到堂妹哭,伊放下了被拍,“看在小娟份上饶唔这趟,下一趟再犯,脚股郎打断忒伊。”
吾看到姆妈的眼中包着泪水,弗晓得伊是因为爱吾才会得打吾,伊弗希望吾犯下不可挽救的错。
堂妹回转后,姆妈抱起吾,两个人一道痛哭,直到哭弗动了。
现在讲起这桩事体,姆妈还讲吾勒记仇,我回伊,弗是记仇,而是记住了自己要有担当,如果没有能力去承担责任,弗要去做领头老鼠。
更多辰光,吾讲这桩事体,是讲给儿子听的,吾希望伊能意识到白相过程中要有安全意识,不管伊是弗是领头老鼠,都要注意好自己和小伙伴的安全问题。伊确实还小,带伊去世纪大道白相,经常遇到伊幼儿园同学,成群结队白相滑板车,却经常偏离大人指定的安全线路,让大人吓出一身又一身的冷汗。
吾一直告诉自己,要让伊多白相,白相是小倌的天性,现在弗白相,啥辰光白相,等伊上小学、上初中吗?当交刮小旁友参加课外补习,吾坚持让伊白相,对伊只有一个要求,安全,要晓得保护自己,保护同伴,这个要求高了一些,需要慢慢来。
伊也吃过生活,这大概是成长中无法避免的。
吾依旧爱伊,伊依旧粘着吾,像牛皮糖一样,喜欢跟吾一道,喜欢让吾陪伊白相、写字,吾问伊,恨吾伐,伊摇头,伊讲伊欢喜吾,伊讲吾是为了伊好。吾告诉伊,这辈子吾希望伊好太太平平咯。
人非圣贤,孰能无错,但交刮事体是可以避免的。至少,要晓得什么能做,什么弗能做。
或者讲,当伊有了警惕心,有了安全意识,晓得如何保护自己,保护人家,即便是在白相辰光,也会得多留一个心眼。
总有一天,伊会真的明白吾的心。就像吾明白姆妈的心一样。
(未完待续)
注释:
挨下来:接下来
宝贝:疼爱
容:宠
搀翻:推翻
辣虎酱:红通通辣乎乎的辣椒酱,用来形容生活的程度
辣膨膨:非常辣
骨殖甏:启东地区用来装骸骨的甏
领头老鼠:带头人
脚股郎:腿
【作者简介:又见叶飘零,江苏启东人,启东市作家协会会员,古龙铁杆粉丝,著有武侠小说《温柔刀》(曾用名《温柔的刀》)】
閱讀更多 又見葉飄零的飄零驛站 的文章