講到2018農曆新年，又點少得花車巡遊！年初一睇完香港花車未夠喉，就要年初三(2月18日)或者年初九(2月24日)過澳門走一轉啦。因為今年澳門邀請咗嚟自法國、葡萄牙、德國、俄羅斯、西班牙、日本等世界各地嘅花車齊齊嚟表演，當然唔少得我哋香港同澳門嘅代表啦！巡遊隊伍會同大家一齊行大運、拜個年，兩日都會沿途派發紀念品㗎！
澳門唔少地方已經有新春佈置，充滿新年氣氛，系時候去一轉影相打卡行大運啦！
今次活動主題會以靈犬旺財送福隊為主角，將過去12年收集到嘅福氣、健康同財富，帶到畀在場嘅每位旅客，而且沿途仲會派禮物畀大家㗎！
今年巡遊路線增設咗有蓋座位俾遊人，咁一家大細都可以舒舒服服坐低欣賞啦~
巡遊沿途仲有好多文藝表演隊伍，夠曬氣氛！
旺財招福 展開好運新一年
澳門賀年重頭戲「華麗盛宴旺財年狗年花車巡遊匯演」將會喺(2月18日)同年初九(2月24日)舉行！匯演當日大家可以沿途欣賞到花車巡遊之外，仲有表演隊伍巡遊、舞臺文藝表演同煙花匯演添！初三當晚嘅起步儀式將會喺晚上8點旅遊塔前嘅西灣湖廣場舉行，15部設計別出心裁嘅花車仲會聯同超過1,000位分別來自8個國家同地區嘅表演隊伍，其中包括9支外隊同25支澳門表演隊，一齊參與呢次盛事。而表演隊伍亦會分成兩批，無論你想留喺西灣湖廣場睇表演、抑或同花車隊一齊由孫逸仙大馬路到澳門科學館，都一樣咁精彩！而初九晚嘅花車巡遊，將會喺晚上8點於沙梨頭北街舉行起步儀式，15部花車會巡遊到終點佑漢街市公園，薜家燕同一眾港澳藝人歌手仲會參與壓軸文藝表演添。今次主辦單位仲好貼心，沿途增設2,300幾個座位，觀眾席仲有帳蓬上蓋，市民同旅客就可以安坐現場欣賞節目啦！
除咗花車巡遊，年初三嘅煙花匯演亦系重點之一，記得準時到達啦~
跟住巡遊睇煙花
同巡遊隊伍一齊睇完花車表演之後，當晚9點45分就可以嚟到澳門旅遊塔外面，同屋企人一齊睇埋煙花先至走啦~今年有關單位特別用咗狗年同2018嚟做主題，已經諗到煙花設計一定好生動，超期待呀～加埋圍繞四周嘅璀璨燈光，要影靚相就梗系唔可以錯過呢個moment啦～澳門政府仲批出咗旅遊塔附近位置可以畀大家玩嚇煙火放嚇炮竹，未試過嘅朋友系時候感受嚇咩叫新年氣氛!
大金龍及醒獅巡遊都吸引到大批途中欣賞，為新一年帶來好運。
仲有好得意小朋友參與表演，祝大家新年快樂！
閱讀更多 行者八戒 的文章
