艺人庄思敏（Jacqueline）本月中结婚，婚后的她已火速复工，今日在电视城拍摄新剧《一笑渡凡间》，她表示：“婚后休息咗几日就开工拍《姊妹淘》，今日就第一日开剧。（咁快复工？）之前好得闲，唔使刻意休息，加上依家边度都去唔到，老公已经返咗台湾。（佢几时再返嚟？）未知，因为依家唔畀入境。（之前喺香港蜜月？）等疫情过去先蜜月，疫情后好多香港人都需要旅行，不过依家疫情严重，大家乖乖留喺香港先。（会唔会补摆酒？）唔知，我唔想，因为好烦，我问咗好多身边朋友嘅意见，女性朋友都话结婚当日烦到爆，但男性朋友就话好玩，因为唔使佢理同当日醉咗，可能会喺台湾同马来西亚摆酒啩！”
对于被怀疑有孕才急急结婚，Jacqueline否则大肚：“唔系，我之前肥咗，依家已经瘦番。生B就随缘，依家大家分隔两地。（佢之前喺香港呀嘛。）应该系冇。（怕唔怕做高龄产妇？）冇得惊，已经系，都冇所谓，最重要系身体好，依家医学发达，而且可以搵代母。（有冇雪卵？）冇！唔使雪住，两年后先，或者直接搵代母。”
另外，提到早前Jacquelin在网上被网民问离婚未，她以“唔敢爬你头”作回应，对此，她笑言：“回应吓佢，我谂佢都系想我回应佢。我唔会介意，都听唔少，听惯晒。我觉得礼貌上都要答，虽然我个答案唔礼貌。”