温馨提示：
本故事并非鼓吹赌博
劝喻各位切勿沉迷赌博
（一）赌场男庄荷变身强盗，劫走半亿筹码！轰动全城！
（二）庄荷难，女庄荷更难！澳门荷官闲话赌场生活
清晨时分，刚下班的明嫂，成身疲累，急步走过皇朝区，正想赶早班巴士返屋企。事因琴晚返工前，个仔已经叮嘱话：今日早上要返学校，班主任有事要商谈，呢啲就係个仔讲「见家长」。
一路行，明嫂一路想。自从丈夫开始准备申请母子二人来澳门时，便一直根据自己的学识水平，不断督促细佬仔学业，从无偷懒。自从来咗澳门，特别係丈夫阿明过身之后，对小健的功课，只有加大力度，生怕佢学业跟唔上，都算托福，孩子功课一直居班中既上游位置。
但今次要「见家长」？真谂唔到因由。
自己由才叔介绍做庄荷，为改善一下家中经济状况。难道係最近二个月的事？
也就是阿明下葬，做完「三七」后，才叔带住几位阿明生前既好同事，来到家中探访，
「明嫂，阿明后事都七七八八吧，仲有咩睇下要我哋同事帮手，」才叔首先问，
「真係多谢晒你地帮手，‥‥‥，但係，‥‥‥；」明嫂有啲為难咁讲，
「明嫂，唔使客气既，明哥生前都好『睇』我哋，大家当作家人咁相处架，」张Sir附和才叔咁话，
「哎，阿明留低俾我啲钱唔多，开讲有话：长贫难顾。我都要想下法子，揾番份工打，如果唔係，我地母子两人迟早坐食山空啦！」
「咁又係，有份工就实际的，‥‥‥，」才叔边讲边諗，
「但係，我文化水平唔高，先初中毕业，而家揾份手作工，都只係七、八千蚊，点够家庭开支吖？」
「不如考庄荷啦，反正而家缺人，」阿达提议，
「薪水虽然高啲，但係要捱更抵夜噃，」，张Sir也有的顾虑咁话，
「无咩行头可以入职就有万几蚊喎，我都讚成阿达既提议，辛苦啲都要囉，」
就係咁，明嫂就开始咗考入庄荷员工行列。
想起入职、培训过程，明嫂至今印象犹新：
果日係明嫂第一日参加培训课程。上堂导师做咗自我介绍后，就开始做示范操作。
只见导师张Sir两手摞著一盒扑克牌，上下咁叠牌操作，明嫂后来知道，呢的操作就叫「洗牌」，接著先生转用右手摞住纸牌，在绿色绒布面，由左向右咁，以弧形路线先向外推，跟著回手内拉；转眼间，一叠纸牌就刻咁做成扇面形状排开，学员睇到纸牌背面的图案，好似一弯花月咁，真係目定口呆。跟住见导师用一张纸牌，由纸版尾部，用右手食指一挑一抖，看时迟、变时快，每片纸牌由尾部逆向「翻身」，现出正面点数和花式图案，瞬眼间，睇嚟似一条同色的「纸牌」长龙，立刻变為「色彩缤纷」的「花龙」，学员们又再张开大嘴，众人喉咙像好似被一啲东西堵住，一时间静咗落嚟，无法开声。
「你哋识唔识呀？」导师收起啤牌，摞响手裡面问同学，
「……，」学员们全部摇头，
「好难嘛？」
「难，……，」大家摄摄地交投接耳，
「呢啲係无用既，」张先生笑笑口跟著讲，
「我唔係培训你哋玩魔术、杂技，我要求你哋完成课程后，经考试或响正式上场时，不能够派错牌，牢记住规则，兑码要正确，杀注唔出错，赔码要准确，仲要计数快而准、清楚。知道无？」
「……，」今次各个学员，不停咁点头。
「你哋今次的培训重点项目係『百家乐』，在课程完结，考试合格后，将会有三个月既试用期，期满成為正式员工，将来仲会有更多机会接受其他摶彩项目的培训，好似：『骰宝』、『廿一点』、『三宝』、『加勒比海扑克』、『花旗骰』」等等，学会一个项目，公司就会向学员发出一张『证书或者牌照』，」
开场白过后，导师张Sir向各人派发一啲上堂注意事项同埋课程讲义。明嫂睇着手上既纸张：好多年无咗上堂的体验，今次自己谂下，真係有啲压力。
「大家睇睇第三张讲义，」张Sir接著讲，
「呢张係讲今堂培训项目既十二部曲：」
大家看到上面写住张Sir讲的话：
「请投注；
几号闲（红色）、几号庄（黄色）；
截止投注；
派牌：闲庄、闲庄；
闲睇牌，庄睇牌；
闲几点，有无对；庄几点，有无对；
闲（庄）搏牌；
定输 / 赢【以下是五部曲】；
闲赢，收庄几份：庄赢，收闲几份 收 / 赔；
（检查）有无「漏收牌」；
反「猪油膏」、关灯；
「请投注」；
张Sir停咗一下，跟住讲，「除了上面既十二部曲外，大家仲要记得，「襟制」：即係向客人公佈今次牌局胜负既『着』灯按钮；所谓：望『芒』，便指大家眼前的荧光幕（monitor）；所有程序做足后，就开始向投注『中彩』的客人派发赔款，呢啲就係『派彩』，」
张Sir将手上一块两边各註明「庄赢」、「闲赢」两字既方形厚骨牌举了一下，接著话，
「所谓收『猪油膏』，就係将头先呢这块放係枱前的『庄赢或闲赢』指示俗称『猪油膏』既骨牌收番，先至可以俾客人重新投注，咁可以避免不必要争吵。这些手势或叫手法，我哋行内叫『手门』，大家培训结束时既考试，其中一项就係要『手门』清晰，唔可以模棱两可。明白未？」
培训班第一天下课，明嫂全身散咗架，头昏脑胀咁，急步走过皇朝区，赶著回家，一改平日的生活习惯，今天家中没烧菜造饭。
个仔小健捧著饭盒，在一边睇住母亲在将日间的培训程序复习，又或准备下一日的测验练习，佢唔明母亲跟勤力咁，要求自己望完讲义内容后，要快、准、清（楚）
明嫂睇住讲义文字，同时回忆或相像实际操作：
「背数快；
套单位要准、快；
执码、晒码、清；
两位数不用报原注码，直接计数；
三位数出完即报出尾数；
边晒（码）边报（数）；
三位数的串洞数，对子串洞数都可直接套单位；
过万要叫P.S.，叫完即上码，不要等；
不要计两次；」
又一段讲义的内容：
「公司闲，座位庄；
公司庄，座位闲；
企位庄，座位庄；
企位闲，座位庄；」
第二日上课不久，因前夜无睡太多，实在眼困，开始打哈欠，耳边响起导师既声音：
「串窿」数直接套单位（对子、庄数），12派132（中间加1，尾数不变）、110派1210（数字中间加1，尾数0不变），九五数11500派111045‥‥‥，」
数日地狱式「口诀」训练，又经过一连串密集式的心算训练，包括一天上、下午，一星期每日既测试，导师务求大家在考核时，或日后在枱面操作上，有一个扎实的根基。
今日又是一阵头昏脑胀要记忆的「手门」；
一位数万千位，支水钱
百位橙够收，蓝要齐
两位数千百位，净尾水
橙够收，蓝要齐
劏鱼（整条投注条数额）减前面的水
头尾水：一、先做尾，成条数减完前面的水，再「望」出边；三位数净头水，背数，套收益再加；净收蓝橙，劏鱼减前面的水，‥‥‥，
下课小息时，明嫂问身边既学员，究竟听得明白无？虽然对方吱唔以对，但年青人，记忆力相信较自己為好，这样，自己的压力又增加咗。
一连两个星期，明嫂每晚回家都没煮饭烧菜。自己加班加点咁自我练习、演练、预习，好应付第二日既测试。為期二个星期既培训班，转眼就过去咗，家中收入增加咗，从无收入至到月入万五，心中有点「安穏」感觉，俗语有话：钱係人胆嘛。
今日小健学校班主任「见家长」，心中预感，一定同自己工作有关，但係真正原因又係咩呢？
閱讀更多 細譚闖江湖 的文章
