ViuTV將於7月開拍新劇《詭探前傳》，早前主角之一、飾演年輕版「忠Sir」的麥子樂，之前提到，將有極具份量的資深演員加盟劇組，「我都係因為呢個原因，更加想接呢套劇！」卻三緘其口，多番遊說後，他仍不願說出該重量級演員是誰，直至昨天（20／6）下午舉行的「誰是師傅」發佈會上答案終於揭曉：「忠Sir」、「八爺」以及司馬志全三師兄弟的師傅 ── 「哲道宗師」彭百川將由鄭少秋飾演，確實係秋官，師傅「真身」被公開，不少網民都在ViuTV的社交網絡專頁直播發帖瘋狂留言，有人話：「估你唔到」、「真係秋官！！！」、「近日股市……怪不得！」，更有人索性將新劇和神劇《大時代》的情節扣連在一起：「故事第一集佢（秋官）就喺天台丟（掉）曬啲徒弟落街！」反應熱烈。
發佈會後，秋官接受訪問時回應指，今次倒戈參演ViuTV新劇，既因總經理魯庭暉以及製作部副總裁金廣誠盛意拳拳，也因酬勞吸引，更重要是彭師傅一角對他而言是嶄新嘗試，「我睇咗第一季（《詭探》）之後，覺得（意念）好新，而且拍得好吸引人，同埋我未做過呢啲角色嘛，所以個興趣咪就係喺呢度囉。」秋官解釋，彭師傅的背景是哲學教授和靈異大師兩者皆有，既接受西方教育，擁有先進思想，信任科學方法，另一邊則對茅山術士有研究，兩者各走極端，看似不能並存，角色甚有挑戰性，故最初獲ViuTV接洽後，他已表示極有興趣，「接呢個劇，就係諗住自己未做過，我又鍾意嘗試新嘅角色，『扮嘢秋』嘛！」
認彭師傅不易演 為《詭探》劇本爛尾解畫
秋官入行經已半個世紀（1967年在電影《黑煞星》擔任男主角），經驗絕對豐富，惟他直言今次演出彭師傅並不容易，需要多做功課，「都幾難嘅，因為我（角色）又係哲學教授，但靈異呢方面呢，就係屬於道家，都唔係咁簡單㗎，不過佢哋有顧問嘅，我就要攞多啲資料，要吸收嚇佢哋畀我嘅訊息先得！」據麥子樂透露，《詭探前傳》的劇本經已寫起，秋官也為網民指《詭探》劇本「爛尾」解話：「我諗係佢哋係專登想鋪去第二季嘅啫，係呀，去到結局都未解到㗎，咁咪第二季去解囉，我諗佢哋係咁樣。我都覺得，誒～點解呢？（解釋）唔夠喎，但上次幾個單元，我覺得拆得幾好呀，都可以。」
不怕大臺小器：我同TVB冇約囉喎！
演員陣容方面，今次秋官以老帶新，除了曾與麥子樂在《桌球天王》（2009）「遠距離」合作過之外，另外兩位徒弟陳安立、遊學修，還有將會在劇中飾演秋官女兒的江若琳和沈殷怡。對於三位徒弟仔在發佈會上跳舞迎接師傅出場，秋官力贊他們三個孺子可教也：「我睇佢哋幾醒目喎，今日少少嘅表演，就好醒目，啲嘢Pick Up得好快，應該得嘅。」自從參演戚其義監製的《心戰》（2012）後，已經有6年沒演港劇，今次卻轉戰新平臺，問秋官是否擔心無綫「嬲豬」，他答得從容：「TVB？我同佢冇約囉喎，我都四圍去做㗎啦，佢哋唔鍾意，咪又拍啲好嘅嘢囉！」欣宜會否有機會在新劇中客串？秋官笑言：「咁就要同製作部研究嚇喇，唔係我話叫就叫！」
麥子樂、遊學修、鄭少秋（秋官）、陳安立
閱讀更多 有火VIVA 的文章
