話說三口八胃童年時曾經口出狂言過將來要成為一位笑容滿面嘅導遊，雖然長大後冇本事去圓呢個夢，讀大學揀科早已離曬題，但紙系包唔住火嘅，我強烈懷疑身體裡面其實蘊藏住啲旅遊大使基因，令我喺呢幾年來情不自禁咁喺各社交平臺度分享本澳嘅醫肚好去處；藉此希望本地人或者遊客，唔使再為「喺邊度開餐好？」呢個問題而愁眉深鎖。
往後嘅每個星期，我將會喺由澳門旅遊局推行嘅《論區行賞步行路線》度加插美食環節，希望嬰兒們多多支持，鎖定「三口八胃論區行嘗」，一於帶領埋味蕾齊齊遊歷呢個咁可愛嘅小城啦！
「三口八胃論區行嘗」01
路線：《歷史足跡·盡在城區》
打頭陣嘅有呢間途經「爐石塘巷」嘅文記咖啡麵食，位置唔難搵，就喺「新馬路/大豐」巴士站附近，望到典當業展示館轉入去條內街就搵到。文記由幾十年前嘅路邊茶檔做到入鋪，成為街坊們心目中「價格平凡，食物非凡」嘅醫肚勝地。
典當展示館▼
文記▲
打開心扉推薦嘅話有滿載住鑊氣嘅鯪魚餅炒通粉加太陽蛋、組合離奇但又異常滋味嘅花生雞扒波蘿包同霸氣十足嘅太陽蛋豬扒包！
行嘗焦點
I HOPE YOU LIKE IT
花生雞扒菠蘿包
雞扒肉汁充沛，調和左花生醬與生俱來嘅嗰種黏口感，波蘿包釋出甜味，與雞扒同花生醬嘅鹹香滋味交織，組合望落離奇，入口卻系異常登對。
鯪魚餅炒通粉加太陽蛋
鯪魚餅由新鮮魚肉手打而成，魚味同質感夠曬實在，炒通粉鑊氣滿載，粒粒都分明彈牙，蘸埋蛋汁一齊食更加銷魂。
▼ 今日推介 | 文記咖啡麵食
● 地址：澳門新馬路庇山耶街宏發樓地舖
● 同區景點：議事亭前地 、郵政總局、玫瑰堂、福隆新街
自2013起她透過社交平臺展開以澳門為核心的美食巡禮；以生動文字及照片為網友“充飢”。關於食物的分享散見於本地報紙、雜誌及網絡平臺、個人Instagram平臺《obxxob》及Facebook專頁《三口八胃》等。
閱讀更多 暢遊全球 的文章
