大臺熱播劇集《法證先鋒IV》，無論主角定配角，同樣引起話題，今次拍到第四輯，主要演員陣容已面目全非，反而配角就長做長有，當中古明華做足四輯《法證先鋒》。不過他現已約滿無線，正式離開合作26年的大臺，該劇成為他的告別作。
今次在《法證先鋒IV》中，古明華飾演一名記者，後因錯手殺死麟仔，畏罪潛逃到馬來西亞，之後易容兼改名換姓，重返香港擔任雜誌社總編，可惜最終天網恢恢，被一眾法證先鋒揭發真相。
雖然今次古明華只參演劇中其中一個單元，但有心水清的網民，就發現古明華在過去三輯《法證先鋒》中都曾經出現，每次均以不同身份現身。例如第一輯的夜總會經理、第二輯的私家偵探及第三輯的流浪漢，造型百變，又無俾人定型，難怪古明華成為多產王，每年拍劇數目，分分鐘比大臺不少小生更多。
55歲的古明華，90年演藝學院畢業，一出道就已經好有「戲」，93年憑電影《旺角馬場》獲提名金像獎新人獎，不過學秋生話齋，「拎影帝衰三年」，雖然古明華無拎影帝，不過獲提名新人獎，對當時古明華的電影之路，未有變成康莊大道。
94年，古明華加入無線，路人甲、清兵乙、大臣丙…默默耕耘17年，終憑《巴不得媽媽》中飾演「蘇基」一角，大受觀眾歡迎，更憑此角色於2012年《萬千星輝頒獎典禮》奪得「最佳男配角」。
其實，不只做戲了得，古明華連「聲」都好出色，經常為不少動畫、外語劇配音，產量絕不比拍劇數目少。又拍劇又配音，皆因古明華全為患有腎病的囡囡，博命搵醫藥費，更試過直踩50小時無休息，是暖男爸爸！
他坦言離巢感到不捨，由於囡囡現時讀大學，開支不少，他亦希望北上發展，尋找更多機會。當年《國產零零漆》的「一路好走」公安，亦為古明華累積了不少內地粉絲，相信這條北上之路，總比當年的電影路，行得更輕鬆。
閱讀更多 灣仔如初見 的文章
